అప్పట్లోనే 25 గదుల బంగ్లా, 7 కార్లు.. అన్నీ పోగొట్టుకుని వీధినపడ్డ బాలీవుడ్ సూపర్ స్టార్!

ఒకప్పుడు ఆయనకు ముంబైలోని జుహూలో 25 గదుల విశాలమైన బంగ్లా ఉండేది. వారంలోని ఏడు రోజులకు, రోజుకు ఒకటి చొప్పున వాడుకునేలా ఏడు విదేశీ కార్లు ఉండేవి. కానీ చివరి రోజుల్లో దాదర్‌లోని ఒక చిన్న గదిలో గడిపి కన్నుమూశారు. ఆయనే ఒకనాటి హిందీ నటుడు, దర్శకుడు, నిర్మాత భగవాన్ దాదా. 1951లో వచ్చిన 'అల్బెలా' సినిమాతో ఆయన రాత్రికి రాత్రే సూపర్ స్టార్ అయ్యారు. అందులోని "షోలా జో భడ్కే" పాట ఆయన్ను శిఖరాగ్రాన నిలబెట్టింది.

సాధారణ టెక్స్‌టైల్ మిల్లు కార్మికుడి కుమారుడిగా పుట్టిన భగవాన్ దాదా, మూకీ చిత్రాలలో చిన్న ఆర్టిస్టుగా ప్రస్థానం మొదలుపెట్టారు. 'అల్బెలా' విజయంతో సొంత స్టూడియో, విలాసవంతమైన బంగ్లా, కార్లతో లక్షాధికారిగా మారారు. అయితే, ఆ విజయాన్ని నిలబెట్టుకోలేకపోయారు. ఆ తర్వాత ఆయన నిర్మించిన సినిమాలు వరుసగా విఫలమయ్యాయి. దీనికి తన వ్యసనాలే కారణమని ఆయనే స్వయంగా ఒక ఇంటర్వ్యూలో అంగీకరించారు.

"మద్యం, మహిళలు నా బలహీనతలు. జూదం, గుర్రపు పందేల మీద ఆసక్తితో సర్వం కోల్పోయాను. బహుశా దేవుడు నన్ను శిక్షించేందుకు ఎంచుకున్న మార్గం ఇదేనేమో. ఒకప్పుడు కోటీశ్వరుడిని, కానీ చివరికి పేదవాడిగా మిగిలిపోయాను," అని ఆయన ఆవేదన వ్యక్తం చేశారు. వ్యాపార భాగస్వాములు కూడా తనను మోసం చేశారని ఆయన చెప్పారు.

సంపద మొత్తం పోయిన తర్వాత, జీవనం కోసం చిన్న చిన్న పాత్రలు చేస్తూ గడిపారు. కేవలం టాక్సీ ఛార్జీల కోసం డబ్బులు అడిగేవారు. రాజ్ కపూర్, అశోక్ కుమార్ వంటి స్నేహితులు టచ్‌లో ఉన్నప్పటికీ, ఆయన ఏనాడూ ఆర్థిక సహాయం కోసం ఎవరినీ అభ్యర్థించలేదు, ఆత్మాభిమానంతో బతికారు. తన 88వ ఏట, 2002లో దాదర్‌లోని ఒకే ఒక్క గదిలో నివసిస్తూ తుదిశ్వాస విడిచారు. ఆయన జీవిత కథ ఆధారంగా 2016లో 'ఏక్ అల్బెలా' అనే మరాఠీ చిత్రం విడుదలైంది.